Die Preisträger*innen sind:

1. Preis: Gesche Roeloffs
2. Preis  Ellin Nickelsen
3. Preis: Enken Tholund

Gesche Roeloffs: Eeb an Flud

Eeb uun man jilpung, uun min hood as flud; 
Ik haa so föl ideen, ‘brük bluat en betj mud. 
Ual an ferkimen, at koostet man luan. 
Skal ik at saniare? Do fu ik det puan! 
Hüs an uk grünjstak –a torepswoi deel, 
wan ik at ferkupe- hü ik mi wel feel? 
Jil uun a hunen – a welt hiart do mi. 
An al de smok steeden, jo wise ik di. 
„Ich bin so föhrliebt“, saad hi ütj Berlin, 
bood mi en miljoon, an ik sluch gliks iin. 
Uunsteed faan a peerbuum stäänt diar nü en Pool. 
Ales apredet, alikent so kuul. 
A torepswoi deel, huar det lok ham ferkreeb- 
flud uun man jilpung, uun min hood as eeb.

Ellin Nickelsen: Blanke Hans

So as hü a winj hüület
So as hü det taag tüüset
So as hü a rin smat
So as hü a kol bat
So as hü a rüütjen rödle
So as hü a bosker sködle
So as hü a buumer büüg
So as hü a beesten bese
An üüb böön a kaater kese
wiar a müsen jo ferkrep.
Det as hü a dören knare
Det as hü a schep blare
Det as hü a kualwer brole
Det as wan a bualker kwise
Det as wan sireenen skrei
Det as wan a maaner skofle
Det as wan baang wüfen teew
Det as wan a ualen beedge
an a jongen stal üüb baad lei
oner hegen jip fersteet.
So as‘t hü a stoof flocht
so as’t hü a sun draft
so as’t wan at sküm skümet
so as’t wan a waagen wäältre
so as’t wan at weeder komt
so as’t wan a winj aproket
so as’t wan a dik apwoket
So as‘t wan at weeder stiigt
Det as hü a dik do breecht
an at leewent dreenket.

Enken Tholund: Ales hee sin tidj

Gulen bradlep uun deetsember.
So stäänt at uun a kalender.
Ik teenk, ik auerlei.
Wat as – wat komt –
ianerlei?
Ik san ei at bridj.